Abschtrakzion

Lueg mau di füf Grafike aa:

Ja, si si ähnlech wüu si aui Himugüegeli si. Jedes Himugüegeli het zwe rooti Flügu, ä schwarze Chopf, unä schwarze Körper. Jede Flügu beschteit aus äme roote Haubchreis wo drei schwarzi Pünkt het, und dr Chopf het zwöi Ouge.

Dr Ungerschiid isch dr Winku zwüsche de zwe Flügu.

Lanis a Funkzion la schribe wones Himugüegeli cha kreiere. D' Funkzion het a Parameter für ä Flügu-Winku.

def himugüegeli(flügu_winku: float) -> Grafik:

U wüu mir gärn Himugüegeli von beliebige Grössine wei kreiere, füere mr no grad ä Parameter namens durchmässer ii.

def himugüegeli(durchmässer: float, flügu_winku: float) -> Grafik:

Usenang Näh

Äs Himugüegeli beschteit grundsätzlech us vier Komponänte: am Chopf, am Körper, und zwe Flügu.

Körper

Ds eifachste Teili isch dr Körper. Das isch nume ä schwarze Chreis.

Chopf

Dr Chopf cha me witer usenang näh: är beschteit us äme schwarze Chreis u zwöi Ouge. Jedes Oug beschteit us äme schwarze Chreis ineme wiise Chreis. Mache mer separati Funkzione um die verschidene Komponänte z'boue.

Dr Pupiue-Durchmässer isch 0.6 mau dr Ougä-Durchmässer.

Dr Ouge-Durchmässer isch 0.35 mau dr Chopf-Durchmässer.

Flügu

Lanis zersch än individuelle Flügu aaluege:

Dr Punkt-Durchmässer isch 0.35 mau dr Flügu-Radius.

Hiwiis: Bou d'Pünkt zäme indäm zwe Zile kreiersch: di oberi Zile het zwe Pünkt unä Punkt-grossi Lücke zwüschedrin, die ungeri Zile het än einzige Punkt.

Jetz lanis zwe Flügu zämesetze, mit äm gwünschte Winku zwüschedrin.

Dr flügu_winku git dr Dräiwinku vomäne individudelle Flügu aa; dr Winku zwüsche de zwe Flügu isch zwöimau so gross.

Hiwiis: Fixier dr ober Flügu unge links, und der unger Flügu obe links. De dräisch beidi Flügu um +/- dr ggäbnig Winku. De kombiniersch di zwe Flügu. Bruuch d'kombiniere-Funkzion für das, so dass d'Fixierposizion vor resultierende Grafik im Scharnier zwüsche de zwe Flügu blibt.

Änd-Montage

Lanis mit dene Komponänte äs kompletts Himugüegeli zämesetze!

Benutz d'chopf-, körper- und flügu-Funkzione um die entschprächende Teili z'erschteue. Dr Himugüegeli-Durchmässer entschpricht am Durchmässer vo sim Körper. Dr Chopf-Durchmässer isch haub so läng wi dr Himugüegeli-Durchmässer, u dr Flügu-Radius isch o haub so läng wi dr Himugüegeli-Durchmässer.

Was Hesch Glehrt

Du hesch Zerlegig güebt, indäm es Problem i mehreri Funkzione zerleit hesch, und Du hesch Abschtrakzion güebt, wüu d'Funkzione Parameter hei, und wüu drum a Funktion grad a ganzi Familie von Grafike cha produziere.